Ծրագրավորման դասընթացներ Գեղարքունիքում

‹‹Luseen Technologies›› ՏՏ զարգացման կենտրոնը համագործակցելով Գավառի պետական համալսարանի հետ  մեկնարկել է Գեղարքունիքի մարզում  տեխնոլոգիական ոլորտի մասնագիտացված կրթական ծրագրերի իրականացումը։

Ծրագրի նպատակն է նպաստել Գեղարքունիքի մարզում ՏՏ ոլորտի զարգացմանը, բարձր տեխնոլոգիաների ոլորտում երիտասարդների որակյալ կրթությանը, աջակցել ‹‹Luseen Mobile›› ընկերությանը՝ համալրվելու երիտասարդ կադրերով:

Ծրագրի շրջանակում Գավառի պետական համալսարանում կանցկացվեն 7 ամսյա դասընթացներ երկու ուղղություններով՝ մոբայլ ծրագրավորում (Java, Android, Kotlin) և վեբ ծրագրավորում (HTML/CSS, JavaScript, Angular, React, Node):

Անկախ ընտրված ուղղությունից՝ մասնակիցները ուսումնասիրելու են նաև անգլերեն լեզու և ‹‹Computer Science›› (ծրագրավորման հիմունքներ, դիսկրետ մաթեմատիկա, ալգորիթմների տեսություն, տվյալների կառուցվածքներ, տվյալների բազաներ)։

Դասընթացները վարում են ‹‹Luseen Mobile›› ընկերության մասնագետները, ԳՊՀ դասախոսներ և այլ առաջատար ՏՏ ընկերություններից ( ‹‹Vteam››, ‹‹Microsoft Academy››) հրավիրված մասնագետներ։ Դասընթացի մասնակիցները սովորելու են իրական նախագծերի միջոցով, որոնք մշակվել և գնահատվելու են ‹‹Luseen Mobile›› ընկերության կողմից։

Դասընթացները հաջողությամբ ավարտած անձինք կստանան ավարտական վկայականներ, իսկ պրակտիկան գերազանցությամբ ավարտած շրջանավարտներին կընձեռվի ‹‹Luseen Mobile›› ընկերությունում աշխատանքի անցնելու հնարավորություն։